چیف جسٹس اسلام آباد ہائی کورٹ جسٹس عامر فاروق نے 24 نومبر کو اسلام آباد میں احتجاج سے متعلق ریمارکس دیے ہیں کہ اگر پی ٹی آئی نے غلط کیا تو حکومت نے بھی غلط کیا۔
چیف جسٹس اسلام آباد ہائی کورٹ جسٹس عامر فاروق نے اسلام آباد کے تاجروں کی جانب سے 24 نومبر کے احتجاج پر پاکستان تحریک انصاف (پی ٹی آئی) کے خلاف توہین عدالت کی درخواست پر سماعت کی۔
حکومتی وکیل کے مکالمے کے دوران جسٹس عامر فاروق نے کہا کہ آپ نے امن و امان بحال کرنا تھا مگر آپ نے پورا اسلام آباد بند کر دیا۔ درخواست گزار نے کہا ہمارے کاروبار کو چلنے دیں۔ عدالت نے آپ سے کہا تھا کہ شہریوں اور کاروباری افراد سمیت احتجاجی مظاہرین کے بنیادی حقوق کا خیال رکھیں۔ آپ نے میڈیا پر ہر جگہ کہا اسلام آباد ہائی کورٹ کے آرڈر پر ہم اجازت نہیں دے رہے۔ آپ نے اسلام آباد کو ایسے بند کیا تھا کہ ججز سمیت میں بھی نہیں آ سکا۔
چیف جسٹس اسلام آباد ہائی کورٹ نے ریمارکس دیئے کہ پی ٹی آئی نے غلط کیا تو حکومت نے بھی تو غلط کیا۔ درخواست گزار کا کیا قصور تھا؟ ان کے کاروبار کو کیوں بند کیا گیا؟، میں پی ٹی آئی سے بھی پوچھوں گا کہ عدالتی احکامات کی خلاف ورزی کیوں کی گئی۔
دوران سماعت انہوں نے ریمارکس دیئے کہ میں اپنے ہی آرڈر کا خود ہی شکار ہو گیا تھا، میں ان سے بھی پوچھوں گا کہ حکومت سے لڑائی میں عام شہریوں کا کیا قصور تھا؟۔
عدالت نے وزارت داخلہ کو معاملے کی تفصیلی رپورٹ جمع کروانے کی ہدایت کرتے ہوئے مقدمے کی سماعت آئندہ ہفتے تک کے لیے ملتوی کر دی۔
