سابق دی جی آئی ایس آئی اور کور کمانڈر پشاور لیفٹیننٹ جنرل ریٹائرڈ فیئض حمید کو فیلڈ جنرل کورٹ مارشل کی کارروائی میں باضابطہ طور پر چارج شیٹ کردیا گیا۔
آئی ایس پی آر کے مطابق لیفٹیننٹ جنرل فیض حمید (ر) کے خلاف 12 اگست 2024 کو پاکستان آرمی ایکٹ کے تحت فیلڈ جنرل کورٹ مارشل کی کارروائی شروع کی گئی تھی۔ جس کے اگلے مرحلے میں انہیں باضابطہ طور پر چارج شیٹ کر دیا گیا ہے۔
بیان کے مطابق ’چارج شیٹ میں شامل الزامات میں سیاسی سرگرمیوں میں ملوث ہونا، آفیشل سکریٹ ایکٹ کی خلاف ورزیاں کرتے ہوئے ریاست کے تحفظ اور مفاد کو نقصان پہنچانا، اختیارات اور سرکاری وسائل کا غلط استعمال اور افراد کو ناجائز نقصان پہنچنانا شامل ہیں۔
لیفٹیننٹ جنرل (ر) فیض حمید کے خلاف ملک میں انتشار پھیلانے اور بے امنی سے متعلق پرتشدد واقعات میں ملوث ہونے کی بھی تفتیش کی جا رہی ہے۔ ان پرتشدد اور بد امنی کے معاملات میں 9 مئی سے جڑے واقعات بھی شامل تفتیش ہیں۔
ترجمان پاک فوج کے مطابق فیلڈ جنرل کورٹ مارشل کے عمل کے دوران لیفٹیننٹ جنرل (ر) فیض حمیدکو قانون کے مطابق تمام قانونی حقوق فراہم کیے جا رہے ہیں۔
