سینیٹ میں 8 فروری کو ہونے والے انتخابات ملتوی کرانے کے لیے قرارداد کثرت رائے سے منظور ہوگئی ہے۔
جمعے کے روز سینیٹ کے اجلاس کے دوران سینیٹر دلاور خان نے عین اس وقت قرارداد پیش کی جب سینیت میں صرف 14 ارکان موجود تھے۔
پیپلز پارٹی کے سینیٹر بہرہ مند تنگی اور پی ٹی آئی کے گردیپ سنگھ نے انتخابات کے التواء کی قرارداد پر خاموشی اختیار کی۔ جب کہ مسلم لیگ ن کے سینیٹر افنان اللّٰہ اور نگراں وفاقی وزیرِ اطلاعات مرتضیٰ سولنگی نے اس کی مخالفت کی۔
دلاور خان نے اپنی قرار داد میں مؤقف اختیار کیا کہ خیبر پختونخوا اور بلوچستان میں سیکیورٹی فورسز پر حملے ہوئے ہیں۔جے یو آئی ایف کے ارکان اور محسن داوڑ پر حملہ ہوا، ایمل ولی کو بھی تشویش ہے، الیکشن کی ریلی کے دوران انٹیلی جنس ایجنسیوں کے تھریٹ الرٹ ہیں۔
انہوں نے اپنی قرار داد میں کہا ہے کہ اکثر علاقوں میں سخت سردی ہے، اس وجہ سے ان علاقوں کی الیکشن کے عمل میں شرکت مشکل ہے۔
منظور کی گئی قرارداد میں کہا گیا ہے کہ سینیٹ الیکشن کمیشن پر اعتماد کرتا ہے۔ مسائل حل کیے بغیر الیکشن کا انعقاد نہ کیا جائے۔ 8 فروری کے الیکشن شیڈول کو ملتوی کیا جائے، الیکشن کمیشن انتخابات ملتوی کرانے پر عمل کرے۔
