امریکی صدر ڈونلڈ ٹرمپ کی جانب سے چین سمیت کچھ ممالک پر نئے محصولات عائد کرنے کے فیصلے کی وجہ سے پیر کو کرپٹو مارکیٹ کو بھاری نقصان اٹھانا پڑا ہے۔ بٹ کوائن کی قیمت میں چار فیصد سے زیادہ کی کمی واقع ہوئی ہے۔
اس رپورٹ کی اشاعت کے وقت، بین الاقوامی کرپٹو ایکسچینج بائی نانس پر بٹ کوائن کی قیمت 95 ہزار 422 ڈالر ہوگئی جو کہ گزشتہ روز کے مقابلے میں 4.26 فیصد کم تھی۔
دنیا کی دوسری بڑی کرپٹو کرنسی ایتھر کی قیمت 16 فیصد سے زیادہ کمی کے بعد 2 ہزار 570 ڈالر پر ٹریڈ کر رہی تھی۔ اس کے علاوہ کارڈانو، پولکاڈوٹ، کاسموس، لائٹیکوئن، سولانا اور بی این بی سمیت کئی کریپٹو کرنسیوں میں کمی آئی۔
کرپٹو مارکیٹ کیپٹلائزیشن گزشتہ ایک دن میں نو فیصد سے زیادہ گر کر تقریباً 3.03 ٹریلین ڈالر تک پہنچ گئی۔
مارکیٹ کے تجزیہ کاروں نے اطلاع دی ہے کہ ٹرمپ کی جانب سے چین اور میکسیکو سمیت کچھ ممالک پر محصولات کے نفاذ سے کرپٹو مارکیٹ میں تقریباً دو بلین ڈالر کی فروخت ہوئی ہے۔ اس نے پوری دنیا میں ہلچل مچا دی ہے۔
تجزیہ کاروں کا کہنا ہے کہ اگر ٹیرف میں ریلیف فراہم نہیں کیا جاتا تو کرپٹو مارکیٹ میں اتار چڑھاؤ جاری رہ سکتا ہے۔ سرمایہ کاروں کو بڑے عالمی واقعات پر نظر رکھتے ہوئے احتیاط کے ساتھ آگے بڑھنا چاہیے۔ امریکا میں کرپٹو کرنسیوں کے لیے ایک ریگولیٹری فریم ورک تیار کیا جائے گا۔
ٹرمپ نے اپنی انتخابی مہم کے دوران بٹ کوائن کے ریزرو اور کرپٹو کے حق میں پالیسی بنانے کا اشارہ دیا تھا۔ تاہم فیڈرل ریزرو نے بٹ کوائن کا ریزرو بنانے کے منصوبے سے اتفاق نہیں کیا۔
یو ایس سیکیورٹیز اینڈ ایکسچینج کمیشن نے کہا ہے کہ کرپٹو کرنسیوں کے لیے ایک ریگولیٹری فریم ورک تیار کرنے کے لیے ایک ٹاسک فورس تشکیل دی گئی ہے۔ پچھلی امریکی حکومت نے کرپٹو سے متعلق کوائن بیس اور کراکین سمیت بہت سی فرموں پر قواعد کی خلاف ورزی کا الزام لگاتے ہوئے کارروائی کی تھی۔ تاہم، ان فرموں نے قواعد کو توڑنے سے انکار کیا۔
