متحدہ عرب امارات میں مقررہ وقت میں سب سے زیادہ وزن کم کرنے کا مقابلہ پاکستانی شہری نے جیت لیا۔۔

عرب ویب سائیٹ کے مطابق متحدہ عرب امارات کی ریاست راس الخیمہ کے اسپتال راس الخیمہ اسپتال (راک) نے وزارت صحت کے تعاون سے وزن گھٹانے کا مقابلہ منعقد کرایا تھا۔

موٹاپے سے نجات حاصل کرنے کی کوشش کرنے والوں کی حوصلہ افزائی اور ان کو رہنمائی فراہم کرنے والے اس مقابلے میں 18 ہزار مقامی اور غیر مقامی افراد نے شرکت کی۔

بیگسٹ ویٹ لاسٹ چیلنج کا آغاز 16 دسمبر سے ہوا اور یہ مقابلہ تین مارچ کو اختتام پذیر ہوا۔مقابلے میں خواتین، سکول کے بچوں اور اساتذہ کے لیے بھی الگ کیٹگریز رکھی گئی تھیں۔ مجموعی طور پر 24 افراد کو انعام دیا گیا جنہوں نے اوسطاً 9 کلو گرام اپنا وزن کم کیا تھا۔

پاکستان کے ضلع کوہلو سے تعلق رکھنے والے انور علی نے سب سے زیادہ 30 کلو وزن کم کر کے پہلا انعام جیتا۔ انہیں انعام میں 9 ہزار درہم کی رقم ملی جو کہ پاکستانی کرنسی میں 7 لاکھ روپے بنتی ہے۔

انور علی نے بتایا کہ مقابلے کے آغاز پر ان کا وزن 120 کلو گرام تھا جو اب کم ہو کر 90 کلو گرام تک آ گیا ہے۔میں نے اڑھائی ماہ تک صرف سلاد اور سبزیاں کھائیں۔ گوشت اور روٹی کو ہاتھ تک نہیں لگایا۔ یہ بڑا مشکل تھا مگر آج مجھے اس کا پھل مل گیا ہے۔