ہارورڈ یونیورسٹی میں لکشمی متل اور فیملی ساؤتھ ایشیا انسٹی ٹیوٹ اور یونیسیف کے تعاون سے امریکہ میں مقیم محققین کی طرف سے کی گئی ایک حالیہ تحقیق میں بھارت کے کمبھ میلے میں اینٹی بائیوٹک کے ضرورت سے زیادہ نسخے تجویز کیے جانے کے حوالے سے ایک پریشان کن انکشاف سامنے آیا ہے۔
بھارت کے کمبھ میلے کو دنیا کا ایک بہت بڑا مذہبی اجتماع اور ایک اہم ہندو تہوار تصور کیا جاتا ہے۔
دسیوں ہزار زائرین ایسے ہیں جو بنیادی طور پر سانس کی نالی کے انفیکشن کے ساتھ میلے میں پہنچ رہے ہیں۔ کمبھ میلے کے اندر موجود کلینک ایسے افراد کو اینٹی بائیوٹکس کی خطرناک حد تک اضافی مقدار تجویز کر رہے ہیں۔
اینٹی بائیوٹکس پر یہ حد سے زیادہ انحصار “اینٹی مائکروبیل ریزسٹنس” کے سنگین مسئلے کو جنم دیتا ہے، یہ درحقیقیت ایک ایسا رجحان ہے جس میں بیکٹیریا اینٹی بائیوٹکس کے خلاف موافقت اور مزاحمت پیدا کر لیتے ہیں اور ان ادویات کو انفیکشن کے علاج میں غیر موثر بنا دیتے ہیں۔ یہی وجہ ہے کہ طبی پیشہ وروں کو اینٹی بائیوٹک کے خلاف مزاحم “سپر بگ انفیکشنز” کی بڑھتی ہوئی لہر کا سامنا ہے۔
ورلڈ ہیلتھ آرگنائزیشن (ڈبلیو ایچ او) نے اس بڑھتے ہوئے مسئلے کی نشاندہی صحت عامہ کے لیے ایک بڑے “عالمی خطرے” کے طور پر کی ہے۔ معروف طبی جریدے دی لانسیٹ کے مطابق، 2019ء میں اینٹی مائکروبیل مزاحمت کی وجہ سے دنیا بھر میں براہ راست 12 لاکھ 70 ہزار ملین اموات ہوئیں اور ڈبلیو ایچ او کے اندازوں کے مطابق یہ تعداد 2050ء تک سالانہ ایک کروڑ اموات تک پہنچ سکتی ہے۔
ہندوستان کا شمار دنیا میں انسانی اینٹی بائیوٹک کے سب سے زیادہ استعمال کرنے والے ممالک میں ہوتا ہے۔ چونکا دینے والی بات یہ ہے کہ صرف اینٹی بائیوٹک سے مزاحمت کرنے والے نوزائیدہ انفیکشنز ہر سال تقریباً 60 ہزار نوزائیدہ بچوں کی جان لے لیتے ہیں۔ مزید یہ کہ کرونا وبا کے دوران اینٹی بائیوٹکس کے غلط استعمال نے صورتحال کو مزید خراب کیا ہے، جس سے بحران مزید سنگین ہو گیا ہے۔
کمبھ میلہ کئی ہفتوں پر محیط اور چار ہندوستانی شہروں میں ہوتا ہے، جہاں یاتری شہروں کے کناروں پر دریا کے پانی میں نہانے کی مقدس رسم میں حصہ لیتے ہیں۔
امریکہ میں مقیم ریسرچ ٹیم نے 70 ہزار سے زیادہ مریضوں کا ڈیٹا اکٹھا کیا جنہوں نے 2013ء اور 2015ء میں پریاگ راج (الٰہ آباد کا نیا نام) اور ناسک کے شہروں میں منعقد ہونے والے فیسٹیول کے دو سالوں کے دوران 40 سے زیادہ کلینکس پر طبی امداد حاصل کی۔ ان دونوں سالوں میں مجموعی طور پر 100 ملین سے زیادہ ہندو عقیدت مند شامل ہوئے۔
سال2013ء میں پریاگ راج میں مریضوں کی اوسط عمر 46 سال تھی، جن میں اکثریت مردوں پر مشتمل تھی۔ ان مریضوں کی عام علامات میں بخار، کھانسی، ناک بہنا، پٹھوں میں درد اور اسہال شامل ہیں۔
نتائج سے پتہ چلتا ہے کہ کلینک کے ایک تہائی سے زیادہ مریضوں کو اینٹی بائیوٹکس تجویز کی گئی تھیں۔ پریاگ راج میں اوپری سانس کی نالی کے انفیکشن والے ایک حیران کن 69 فیصد مریضوں کو میلے کے مقام پر سرکاری کلینک میں اینٹی بائیوٹکس دی گئیں، حالاںکہ ان میں سے زیادہ تر انفیکشنز کی نوعیت صرف ایک وائرل جتنی تھی۔
ہندوستان کے اسپتالوں میں جاری کردہ تمام نسخوں کا 75 فیصد براڈ اسپیکٹرم اینٹی بائیوٹکس پر مشتمل ہے۔
محققین نے اینٹی بائیوٹک نسخوں کی من مانی نوعیت کو اجاگر کیا، ہندوستان میں اینٹی بائیوٹک نسخے تجویز کیے جانے کی شرحوں کے پہلے تخمینوں کے مطابق، بیرونی مریضوں کی ترتیبات میں 39 سے 66 فیصد تک تھیں۔
ہجوم سے بھرے کمبھ میل کلینکس کے ڈاکٹروں کو اہم چیلنجز کا سامنا کرنا پڑا، جس میں مریضوں کی زیادہ تعداد، مشاورت کا محدود وقت اور ناکافی تشخیصی معلومات شامل ہیں۔ اوسطاً، ڈاکٹر ہر مریض کے ساتھ تین منٹ سے بھی کم وقت گزارتے ہیں، اکثر جامع معائنے کے بغیر اینٹی بائیوٹکس تجویز کر دیتے ہیں۔
سرکاری پروٹوکول نے پیروی کی سفارش کے ساتھ تین دن کی اینٹی بائیوٹک سپلائی کی اجازت دی، لیکن زیادہ تر زائرین نے ایک ہی دن کے لیے میلے کا دورہ کیا، جس کی وجہ سے ریکارڈ مرتب کیا جانا ممکن نہ تھا۔
ان نتائج کے جواب میں تحقیقی ٹیم نے مستقبل کے تہواروں میں اینٹی بائیوٹک نسخوں کو کم کرنے کے لیے اقدامات تجویز کیے۔ انہوں نے تجویز پیش کی کہ نان فزیشن ہیلتھ فراہم کرنے والے، طبی طلباء اور کمیونٹی ہیلتھ ورکرز مریضوں کی شناخت کر سکتے ہیں اور مریضوں کی ابتدائی تشخیص کے نظام کو نافذ کر سکتے ہیں، جس سے ڈاکٹروں کے ذریعے دیکھے جانے والے مریضوں کی تعداد کم ہو سکتی ہے۔
مزید برآں، کلینک تشخیصی خدمات سے لیس ہونے چاہئیں اور صحت کی دیکھ بھال کرنے والے پیشہ ور افراد کو اینٹی بائیوٹک کے استعمال کے بارے میں بہتر تعلیم کی ضرورت ہے۔ تین دن کی اینٹی بائیوٹک خوراک فراہم کرنے کی پالیسی کا بھی از سر نو جائزہ لیا جانا چاہیے۔
یہ انکشاف عالمی سطح پر اینٹی بائیوٹک مزاحمت کے بڑھتے ہوئے خطرے سے نمٹنے کے لیے فوری کارروائی پر زور دیتے ہوئے ایک سخت انتباہ ہے۔ اس میں ہندوستان میں اینٹی بائیوٹک نسخوں سے متعلق مضبوط ضابطوں کا مطالبہ کیا گیا ہے، جس کا آغاز کمبھ میلے سے ہوا، جو کہ 2025ء میں ممکنہ طور پر ایک فعال ڈیجیٹل ہیلتھ انفراسٹرکچر کی بنیاد رکھ سکتا ہے جو کلینیکل، لیبارٹری، منشیات کے استعمال اور سیوریج ڈیٹا کی بنیاد پر بیماریوں کی شناخت کرنے کے قابل ہو گا۔
