قومی کرکٹ ٹیم کے چیف سلیکٹر وہاب ریاض نے نیوزی لینڈ کے خلاف ٹی 20 سیریز کے لئے اعلان کردہ اسکواڈ میں اعظم خان کی شمولیت کی وجہ بتادی۔

گزشتہ چند برسوں کے دوران وکٹ کیپر بیٹر اعظم خان کے ٹیم میں ان اور آؤٹ ہونے کا سلسلہ جاری ہے۔ ہر مرتبہ ان کے وزن اور فٹنس کو جواز بناکر انہیں ڈراپ کیا جاتا ہے۔

نیوزی لینڈ کے خلاف ٹی ٹوئنٹی سیریز کے لئے اعظم خان ایک مرتبہ پھر قومی ٹیم مین جگہ بنانے میں کامیاب ہوگئے ہیں۔ چیف سلیکٹر وہاب ریاض نے ان کی سلیکشن کی وجہ بھی بتادی ہے۔

پریس کانفرنس کے دوران وہاب ریاض نے کہا کہ ہم نے اعظم خان کو قریب سے مانیٹر کیا ہے اور فٹنس پر مہارت کو ترجیح دی ہے۔ کھلاڑی کا میچ ونر ہونا زیادہ اہم ہے۔

وہاب ریاض نے کہا کہ میرے خیال میں ہر کسی کو نئے ٹیلنٹ کی شمولیت کا خیرمقدم کرنا چاہیے۔ اعظم خان نے نے پی ایس ایل اور ڈومیسٹک کرکٹ میں اپنی صلاحیتوں کا لوہا منوایا ہے۔ انہوں نے اپنی فٹنس پر بھی کافی محنت کی ہے۔ ہم نے اسے واضح پیغام دیا ہے اور جب وہ دورے سے واپس آجائیں گے تو آپ کو اس کی فٹنس میں فرق نظر آئے گا۔

چیف سلیکٹر نے کہا کہ ہم نے اسکواڈ کا انتخاب پاکستان ٹیم کے بہترین مفاد میں کیا گیا ہے۔ حسیب اللہ اور اعظم خان ڈومیسٹک کرکٹ کے ٹاپ پرفارمر ہیں۔ پاکستان نے حالیہ برسوں میں بیک اپ کے ساتھ جدوجہد کی ہے۔ T20 ورلڈ کپ کو ذہن میں رکھتے ہوئے، ہم اپنے کچھ کھلاڑیوں کو جانچنا چاہتے ہیں اور دیکھنا چاہتے ہیں کہ وہ کہاں کھڑے ہیں۔

سابق فاسٹ بالر نےکہاکہ ہم نمبر 4 سے نمبر 7 تک کے بلے بازوں کو تیار کرنا چاہتے ہیں جو کہ T20 کرکٹ میں پاکستان کے لیے ایک مشکلات کا باعث ہیں ۔ حیدر علی، شعیب ملک، خوشدل شاہ اور فہیم اشرف کو ان عہدوں پر مواقع ملے لیکن وہ اثر پیدا کرنے میں ناکام رہے اس لیے ہم آئندہ ٹی ٹوئنٹی ورلڈ کپ میں نئے آپشنز تیار کرنا چاہتے ہیں۔